أحلى الأوقات

كلمة حكمة قالها عمرو واكد لحنان ترك في فيلم «أحلى الأوقات» لما قال لها: «اتخرجت من هندسة وأنا عارف إني مش مهندس وإني بتاع أراجوزات، جايز مكونش أهم واحد بتاع عرايس وممكن ما أبقاش أهم واحد في المجال ده، بس ده اللي أنا بحب أعمله.» خلينا نتفق إن ساعة الحظ ما بتتعوضش. ساعة حظك هي الساعة اللي بتعمل فيها اللي بتحبه من قلبك. بيقولوا لما بيبقى نفسك في أكلة معينة ده معناه إن جسمك محتاج العناصر اللي في الأكلة دي وساعتها لازم تسمع كلامه. عشان كده النبي قال استفت قلبك وإن أفتاك الناس. ممكن يكون العقل والمنطق بيقولوا حاجة لكن القلب ليه قول تاني. القلب بيقول على اللي محتاجه، واللي من غيره يموت. محدش بيموت من وجع القلب، لكن بيعيش ميت. لما تبقى نفسك في حاجة اعملها، محدش ضامن بكرة، وحتى لو ضمنته الإحساس ما بيتعوضش، عمر الإحساس ما ينفع يتخزن أو يتكرر، كل لحظة ليها بصمتها اللي ما بتشبهش غيرها. أنت نفسك ما بتشبهش نفسك مع الزمن، مش بس في الملامح لكن في الروح. امسك في اللحظة الحلوة عشان اللي بيروح ما بيجيش. اعمل غية حمام من اللحظات الجميلة اللي هتخلص بسرعة لكن مسيرها ترجع الغية وهي ذكريات جميلة، لإن لما العمر بيجري بينا مش بيبقى منه غير شوية لحظات بتبقى هي بجد أحلى الأوقات.