فكرة خراب البيوت فكرة عاملة هوس في وجدان المجتمع المصري. الست جوزها يخونها يقصر في حقها يقولولها متخربيش بيتك والست تعشش والراجل يطفش. المجتمع بيتوقع من الست تكون ملائكية ملهاش طلبات ولا شهوات تسبح بحمد زوجها وتستغفر له ولو كان شيطان رجيم. وفكرة خراب البيوت دي محورية لأن كل هم المصريين هو المظاهر. وأمثال زي «بيوت مقفلة على بلاوي متلتلة» و«اللي يشوف الباب وتزويقه ميشوفش من جوا نشفان ريقه» و«من بره هالله هالله ومن جوا يعلم الله» بتوضح هوس المصريين بالمظاهر. لما واحدة تقول عاشت عمرها كله مع زوج عمره ما قال لها كلمة حلوة ولا جبر بخاطرها ولا حسسها حتى إنها واحدة ست وكاسر نفسها وبيضربها وبيخوفها وما بيصرفش على البيت ويقولولها ضل راجل ولا ضل حيطة فدي مش نصيحة ولا حفاظ على البيت ده سند على حيطة مايلة وراجل فقد ظله.
تعليقات
إرسال تعليق