من ساعة ما انتشرت صورة
صلاح وهو بيقرا كتاب «فن اللامبالاة» والكل بقى عمال ينزل مقتطفات مترجمة من
الكتاب قريتها خلت الواحد زي حزلقوم لما غسان مطر قال له إعمل الصح قال له يعني
أعمل ايه، فمن واقع تجربتي توصلت للتالي:
1.
زمان كنت بحاول اعمل بآية «والكاظمين الغيظ والعافين عن
الناس»، وكنت بتعب جدًا نفسيًا، فسبحان الله فجأة نورت عندي كده وافتكرت آية «لا
يكلف الله نفسًا إلا وسعها» فأنا مش مطلوب مني استحمل حاجة فوق طاقتي، فده بيخلينا
نرجع لنصيحة الأمهات اللي بتقول اللي يضربك اضربه، واللي يشتمك اشتمه، لإني كنت
برضو زمان بفتكر الحديث بتاع الرجل اللي دخل شتم سيدنا أبو بكر مرة واتنين وتلاتة
لغاية ما سيدنا أبو بكر اتنرفز ورد عليه فقام رسول الله عشان كده الشيطان حضر في
المجلس، ساعات سبب تعبنا إننا بنحاول نكون مثاليين مع إننا مش مثاليين ولا حاجة والعالم
حوالينا مش مثالي، ده مش معناه إننا منحاولش نكون أحسن لكن معناه إننا مش مفروض
علينا الخيار ده ممكن نكون مش بالقوة دي، وساعتها من حقنا ننتصر لنفسنا ربنا بيقول
(وَإِنْ عَاقَبْتُمْ فَعَاقِبُوا بِمِثْلِ مَا عُوقِبْتُم بِهِ) وربنا برضو قال (وَلَمَن
صَبَرَ وَغَفَرَ إِنَّ ذَٰلِكَ لَمِنْ عَزْمِ الْأُمُورِ) الصبر بيحتاج قوة تحمل
جبارة وعشان كده ربنا قال إنه من عزم الأمور يعني الأمور الشديدة وعشان كده الصبر
باب من أبواب الجنة، فمتحاولش تكون مثالي وتكلف نفسك فوق طاقتها.
2.
مفيش حاجة اسمها خليك أنت أحسن، وهو لما يشوفك أنت أحسن
منه هيختشي على دمه ويتكسف من نفسه. الكلام ده مش صحيح لعدة أسباب: أولًا؛ اللي
اختشوا ماتوا، ثانيًا؛ أنت مش مضطر تكون أحسن من حد أو تثبت لحد إنك أحسن منه أنت
زي ما أنت ليك حقوق وعليك واجبات اللي يقدرك قدره، واللي يكدرك كدره.
3.
«الدنيا دي بتحترم بس اللي عنده فلوس أما اللي يحتاج لها بتذل فيه
وتدوس» أيوة الكلام ده مضبوط، في حقايق مرة في الحياة لا بد من تقبلها، لإنها لا
يمكن تغييرها. الحياة ليست عادلة ومن غير المفترض أن تكون عادلة، اسعى في الدنيا
إنك تتعامل بعدالة لكن لو محصلش ده فمش نهاية العالم. «شخلل عشان تعدي» و«بفلوسك
وبمالك هتنول اللي في بالك لا بأصلك ولا فصلك ولا حسنك وجمالك» حقائق كونية لا
يمكن تجاهلها.
4.
«مفيش حلاوة من غير نار» كل شيء في الدنيا دي له ثمن. وبرضو
الحداية مبتحدفش كتاكيت فلو أنت مش مستعد تدفع التمن متستناش الحاجة الحلوة، ولو
حد إداك حاجة حلوة من غير ما تدفع تمنها أعرف يا حلو إن أنت التمن.
5.
«اللي عايز الدح ما يقولش يح» وده بيشير إلى الجانب السلبي اللي
لازم يدفع. مثلًا الشهرة زي ما من جوانبها الإيجابية حب الناس وتيسير المصالح، فمن
جوانبها السلبية انعدام الخصوصية. وقيس على ده كتير، فزي ما بتستمتع بالجانب
الإيجابي من الشيء اعرف إن برضو لازم يكون فيه جانب سلبي لازم تستحمله.
6.
«السمكة التي تبقى فمها مغلقًا لن يصطادها أحد». ساعات بيكون من
الحكمة السكوت. زمان أستاذ التاريخ في ثانوية عامة عمل مسابقة على مستوى مجموعات
الدرس وقال اللي هيجيب الدرجة النهائي ليه جايزة كبيرة. فالمجموعات متوزعة على
الأسبوع فاللي كانوا قبل مجموعتي قالوا لي على الأسئلة، وأنا من خيبتي قلت للي
معايا في المجموعة وامتحنا وجبت الدرجة النهائية، وهما رغم علمهم بالأسئلة
مجابوهاش وهنا الغيرة خلتهم قالوا إني كنت عارفة الأسئلة اللي جاية، وسألني المستر
قلت له حصل. بس أنا فعلًا متوقعتش إنه بالسذاجة اللي تخليه يحط الامتحان هو هو بلا
تغيير ويصدق إن مفيش حد هيسربه لكني كنت من الغباء إني لما عرفت حاجة مسكتش وكفيت
على الخبر ماجور وكنت أخدت الجايزة. وبصرف النظر عن الجانب الأخلاقي، فأنا مغشيتش
لكن دي معلومة جت لي ورغم إني عملت فيهم جميلة وقلت لهم لكنه مطمرش، فاقفل بقك
أحسن.
تعليقات
إرسال تعليق